Málverk af Unni Brá Konráðsdóttur, fyrrverandi forseta Alþingis, var afhjúpað í efrideildarsal Alþingis í gær. Viðstödd voru Unnur Brá, fjölskylda hennar og vinir, forseti Alþingis, alþingismenn og stjórnendur á skrifstofu Alþingis.
Hefð er fyrir því að máluð sé portrettmynd af forseta þingsins eftir að hann lætur af embætti. Stephen Lárus Stephen listmálari málaði myndina.
Unnur Brá var forseti Alþingis á 146. og 147. löggjafarþingi sem bæði stóðu árið 2017. Hún var fyrst kjörin á þing í alþingiskosningunum 25. apríl 2009 af framboðslista Sjálfstæðisflokksins í Suðurkjördæmi og sat á þingi samfellt fyrir sama flokk og sama kjördæmi til ársins 2017.
Á Alþingi gegndi Unnur Brá meðal annars formennsku í allsherjar- og menntamálanefnd á árunum 2013–2016 og í Íslandsdeild Vestnorræna ráðsins. Þá sat hún í forsætisnefnd á árunum 2009–2013.
Á árunum 2018–2020 var Unnur Brá aðstoðarmaður ríkisstjórnar Katrínar Jakobsdóttur. Að því loknu var hún formaður stýrihóps um framkvæmdir við nýjan Landspítala í tvö ár. Þá starfaði hún sem var aðstoðarmaður Guðlaugs Þórs Þórðarsonar í umhverfis-, orku- og loftslagsráðuneytinu á árunum 2022–2024. Áður en Unnur Brá var kjörin á þing var hún sveitarstjóri í Rangárþingi eystra og sat jafnframt í sveitarstjórn.
