Við yfirferð stjórnar Brunavarna Árnessýslu á starfsemi BÁ, sem tengjast starfslokum Péturs Péturssonar slökkviliðsstjóra, hefur stjórnin ákveðið að vísa málinu til lögreglu til rannsóknar. Málið varðar fjárreiður Brunavarna Árnessýslu.
Þetta kemur fram í tilkynningu frá stjórn Brunavarna Árnessýslu en starfsmönnum BÁ var tilkynnt þetta í bréfi frá stjórninni í morgun.
„Stjórn Brunavarna Árnessýslu lítur málið alvarlegum augum. Með hliðsjón af því að málið er nú komið til rannsóknar hjá lögreglu telur stjórn ekki rétt að tjá sig frekar um efni þess að svo stöddu. Stjórn leggur áherslu á að rannsókn fari fram með þeim hætti sem lög mæla fyrir um og að réttur allra aðila verði virtur,“ segir í tilkynningunni.
Lét þegar af störfum
Eftir að Pétri voru tilkynntir málavextir á dögunum komust hann og stjórnin að samkomulagi um uppsögn og lok ráðningarsambands hans. Hefur hann þegar látið af störfum og Lárus Kristinn Guðmundsson, varaslökkviliðsstjóra, hefur verið ráðinn tímabundið í starf slökkviliðsstjóra.
„Brunavarnir Árnessýslu bs. er byggðasamlag í eigu aðildarsveitarfélaga sem annast lögbundna brunavarna- og viðbragðsþjónustu á starfssvæðinu. Starfsemin er fjármögnuð af
sveitarfélögunum og ber stjórn því ríka ábyrgð á að gæta hagsmuna byggðasamlagsins og fara með fjármuni þess af ábyrgð,“ segir ennfremur í tilkynningunni og þar er starfsfólki þakkað fyrir fagmennsku og áframhaldandi mikilvægt starf í þágu íbúa og viðbragðsaðila á starfssvæðinu. „Starfsemi Brunavarna Árnessýslu er óbreytt og öll lögbundin þjónusta og viðbragðsgeta eru óskert.“
