Malbikunarframkvæmdum á Suðurlandsvegi, við Bitru í Flóahreppi, verður seinkað til klukkan 9:30 í dag vegna veðurs. Til stóð að framkvæmdirnar færu fram í nótt og fram á morgun.
Þetta kemur fram í tilkynningu frá Colas sem sér um framkvæmdirnar. Framkvæmdir halda svo áfram í kvöld, fimmtudagskvöldið 13. ágúst, frá kl. 21:00 – 07:00 samkvæmt áætlun. Annarri akreininni er lokað á meðan á framkvæmdum stendur á um 1,3 km kafla við Bitru. Hliðavegir eru lokaðir tímabundið á meðan farið er framhjá. Umferð verður stýrt framhjá framkvæmdasvæðinu og merkingar settar upp.
Vegfarendur eru beðnir um að virða merkingar og hraðatakmarkanir og sýna aðgát við vinnusvæðin. Vinnusvæðin eru þröng og menn og tæki eru við vinnu mjög nálægt akstursbrautum.