Stokkseyringurinn Jökull Logi Arnarsson, sem búsettur er í Berlín, er með mörg járn í eldinum. Hans nýjasta útspil er fatamerkið SLOJ en hann hefur nú þegar hannað boli, hettupeysur og derhúfur undir þessu nýja merki.
„Hugmyndin á bakvið SLOJ kom með Lummborghini derhúfunum. Ég teiknaði mynd af lummubíl og skrifaði Lummborghini undir, og síðar kom Free Miss Snus hugmyndin sem er á bolnum og peysunum. Free Miss Snus er eins konar áróður gegn þýska kerfinu, þar sem að bagg er ólöglegt hérna,“ segir Jökull Logi í samtali við sunnlenska.is.
Hann hlær þegar hann er spurður að því hvort hann sé að stuðla að munntóbaksnotkun.
„Nei, ég vil alls ekkert sjá fleiri nota munntóbak eða vera að peppa það, en ég vil bara geta keypt mér bagg hérna í Berlín sjálfur. Svo þetta er mín listræna tjáning um mitt ströggl, sem er kannski algjört lúxus ströggl miðað við margt annað, að þurfa að panta bagg á netinu en ekki í Svens, en maður verður að berjast fyrir einhverju og þetta eru víst spilin sem mér áskotnaðist,“ segir Jökull léttur.
Allar vörurnar eru 100% bómull, úr þykku og endingargóðu efni. Peysurnar eru til dæmis 400 GSM (grams per square), svo þær eru þungar, hlýjar og endast lengi.
„Ég ákvað að halda mig bara í bómul vegna þess að Hvergerðingurinn og vinur minn hann Atil Eyberg, hættir ekki að tala um hversu slæmt pólýester er fyrir húðina. Hann er algjör heilsuséní og fáránlega klár, svo ég tek hann á orðinu og ef hann getur klæðst fötunum mínum þá ættu flestir heilsukvíðapésar að geta það líka. Þetta er ákveðinn heilsustimpill,“ segir Jökull að lokum.
Hægt er að kaupa SLOJ vörurnar á slojworldwide.com og hægt er að skoða þær betur á Instagram síðu SLOJ.
