Nú stendur yfir mikilvægur undirbúningur í Efri-Laugardælaeyju fyrir uppsetningu turns nýju Ölfusárbrúarinnar.
Smíðað hefur verið svokallað skapalón sem er notað til að staðsetja nákvæmlega innsteyptar boltafestingar í undirstöðu turnsins, en turninn verður boltaður fastur við þær.
Mikla nákvæmni þarf við verkið. Boltafestingarnar þurfa að vera á réttum stað með aðeins um eins millímetra skekkjumörkum, eins og Hjörtur Freyr Jóhannsson, verkefnastjóri hjá ÞG verktökum, greinir frá í myndbandinu hér að neðan.
Turninn sem reistur verður í Efri-Laugardælaeyju verður um 60 metra hár og verður einn mest áberandi hluti brúarinnar.