Maðurinn fundinn – Gekk yfir Eyjafjallajökul

Belginn sem leitað hefur verið að í allan dag er fundinn. Björgunarsveitarmenn gengu fram á hann við Steinholtsá norðan við Eyjafjallajökul.

Maðurinn var nokkuð þrekaður þegar komið var að honum en hann hafði gengið yfir Eyjafjallajökul.

„Þetta fór sem betur fer vel,“ sagði Gunnar Stefánsson, hjá Landsbjörgu, en um 70 manns voru við leit í dag ásamt þyrlu Landhelgisgæslunnar.

Spor sem fundust seinni partinn í dag voru hugsanlega talin hafa verið eftir manninn. Á sjöunda tímanum fannst bakpoki mannsins á norðanverðum Eyjafjallajökli nánar tiltekið við Kirkju. Rétt áður hafði sími mannsins komið inn á endurvarpa við Þórólfsfell.

Eftir þetta var ákveðið að færa leitina meira yfir á jökulinn og skilaði það árangri kl. rúmlega 19 í kvöld.

Maðurinn er um þrítugt. Hann er er belgískur en býr í Noregi.