Mælar á Mýrdalsjökli yfirfarnir

Sl. miðvikudag fóru starfsmenn frá Veðurstofu Íslands og Jarðvísindastofnun Háskólans á Mýrdalsjökul til að yfirfara tækjabúnað fyrir veturinn.

GPS mælar á vegum þessara stofnana, og skjálftamælar sem settir voru niður í tengslum við rannsóknarverkefnið Volcano Anatomy, hafa safnað gögnum uppi á jöklinum um skeið.

Landhelgisgæslan flaug með búnaðinn og hluta af mannskapnum upp á Entu sem er norðan við Kötluöskjuna. Þar voru settir niður rafgeymar og komið á samskiptum við skjálftastöðina. Ekki þurfti að skipta um búnað á GPS stöðinni.

Síðan var farið á Austmannsbungu sem er við norðaustanverðan öskjurimann. Þar var komið á samskiptum við skjálftastöðina og streyma nú rauntímagögn til Veðurstofunnar frá báðum þessum stöðvum.

Á vef Veðurstofunnar kemur fram að unnið sé að því að koma skjálftagögnunum inn í jarðskjálftamælakerfi Veðurstofunnar og munu þau nýtast vel við staðsetningu skjálfta í Kötlu.