Lúðrasveit Þorlákshafnar fékk hæsta styrkinn þegar úthlutað var úr Lista- og menningarsjóði Ölfuss í síðustu viku, fyrir árið 2026.
Lúðrasveitin fékk 505 þúsund króna styrk vegna vortónleika sinna. Tónlistaskóli Árnesinga fékk 250 þúsund króna styrk vegna verkefnisins Brú milli tóna og ARGH-verjar fengu 200 þúsund króna styrk vegna listasýningarinnar Hamingjuopnun. Þá fékk Hamingjuhöfn 200 þúsund króna styrk vegna miðlunar frétta úr heimabyggð. WindWorks, alþjóðleg tónlistarhátíð fékk 100 þúsund króna styrk og sama upphæð fór til Kirkjukórs Kotstrandarsóknar og Hveragerðis vegna afmælistónleika og þá fékk Ármann Elías 85 þúsund króna styrk vegna verkefnisins Lifandi popptónlist.
Að þessu sinni var rúmlega 1,4 milljón króna til úthlutunar og bárust fjölbreyttar umsóknir sem endurspegla öflugt lista- og menningarlíf í sveitarfélaginu. Markmið sjóðsins er að efla menningarstarfsemi og listsköpun í Ölfusi og styðja við verkefni sem tengjast sveitarfélaginu með einum eða öðrum hætti.