Lögreglan á Suðurlandi var kölluð út í morgun vegna manns sem var á sundi í Ölfusá fyrir neðan Ölfusárbrú.
Maðurinn skilaði sér upp á bakka árinnar stuttu eftir að lögreglan mætti á vettvang. Lögreglan ræddi við sundmanninn þegar hann var kominn uppúr og varð honum ekki meint af sundinu. Áin er mjög straumhörð og hættuleg á þessum kafla.
Ölfusárbrú var lokað á meðan lögregla var á vettvangi en ekki þurfti að kalla út sjúkrabíla eða björgunarsveitir.
Í lögreglusamþykkt Sveitarfélagsins Árborgar er umferð báta og annarra farartækja bönnuð á ánni, en ekkert minnst á sundferðir. Maðurinn var því frjáls ferða sinna eftir sundið.
RÚV greindi fyrst frá og þar má sjá myndband af sundmanninum.