Lögreglan og skatturinn í eftirlitsferð

Lögreglumenn og starfsmenn ríkisskattstjóra fóru í gær í sameiginlega eftirlitsferð með ökutækjum í ferðaþjónustu og voru í uppsveitum Árnessýslu. Höfð voru afskipti af 52 ökutækjum og fimm ökumenn voru kærðir.

Ökumennirnir voru kærðir vegna meintra brota á reglum um aksturs- og hvíldartíma og/eða notkun ökurita og tvö ökutæki reyndust án ökurita. Sjö aðilar gáfu tilefni til sérstakra afskipta starfsmanna ríkisskattstjóra.

Eftirliti sem þessu hefur verið sinnt reglubundið undanfarin tvö ár og segir lögreglan að almennt séð verði að hrósa aðilum ferðaþjónustu fyrir batnandi ástandi í rekstri sínum.

Samstarf lögreglu og ríkisskattstjóra hefur reynst skila miklu og má gera ráð fyrir að ferðum sem þessum fjölgi frekar á árinu, segir ennfremur í tilkynningu lögreglunnar.