Lögreglan leitar að Stebba

Eftir nóttina liggja fyrir tvær tilkynningar um líkamsárásir hjá lögreglunni á Selfossi, báðar á skemmtistaðnum Hvítahúsinu á Selfossi. Fjölmennur dansleikur fór fram í húsinu í nótt þar sem ítrekað kom til ryskinga.

Fyrri árásin átti sér stað rétt um klukkan tvö þegar maður sló annan í höfuðið með flösku. Sá sem varð fyrir árásinni hlaut skurð á höfði og hann var fluttur með sjúkrabifreið á heilsugæslunstöðina á Selfossi þar sem gert var að sárum hans.

Ekki er vitað með vissu hver árásarmaðurinn er. Honum er lýst með axlasítt dökkt hár og þrekvaxinn. Hann var í köflóttri skyrtu og með græna derhúfu og kallaður Stebbi. Lögreglan biður þá sem voru vitni að árásinni eða geta veitt upplýsingar að hafa samband í síma 480 1010.

Uppúr klukkan fjögur var óskað eftir aðstoð lögreglu vegna áfloga inni á skemmtistaðnum. Einhver ólga var á meðal hóps manna sem lyktaði með því að dyraverðir yfirbuguðu einn mann sem lögreglumenn handtóku og fluttu á lögreglustöð þar sem hann var vistaður í fangaklefa. Grunur var um að maðurinn hefði slegið dyravörð í andlitið með þeim afleiðingum að tönn brotnaði. Meintur árásarmaður var látinn laus að lokinni yfirheyrslu.

Lögregla biður þá sem geta veitt upplýsingar um árásina og hópslagsmálin að hafa samband í síma 480 1010.

Í nótt leið bárust lögreglu fjórar kvartanir vegna samkvæmishávaða í heimahúsum. Þegar lögreglumenn komu á vettvang höfðu íbúar annað hvort verið búnir skrúfa niður eða gerðu það um leið og lögreglumenn komu.