Lögreglan á Suðurlandi vekur athygli á því að á morgun, fimmtudaginn 14. mars, má búast við aukinni umferð viðbragðsaðila um Árnessýslu fyrri hluta dags.
Þá fer fram samþjálfun lögreglunnar á Suðurlandi, sérsveitar Ríkislögreglustjóra og sjúkraflutninga Heilbrigðisstofnunar Suðurlands.
Í tilkynningu frá lögreglunni er tekið fram að engin hætta er á ferðum en æfingin er hluti af æfingaáætlun sem er ár hvert hjá lögreglu og er unnin í tengslum við ákveðna viðbragðsaðila.
„Við vonumst til að æfingin valdi sem minnstri truflun en búast má við umferð stórra og lítilla tækja, frá þessum viðbragðseiningum á morgun,“ segir í tilkynningu lögreglunnar.