Lögregla rannsakar hvarf á köttum

Lögreglan á Selfossi hefur til rannsóknar kæru um brottnám kattar á Selfossi sem fannst síðan heill á húfi í Ölfusinu. Samkvæmt heimildum sunnlenska.is hafa tveir einstaklingar á Selfossi stundað það að veiða ketti og skilja þá síðan eftir fyrir utan bæjarmörkin.

Þorgrímur Óli Sigurðsson, aðstoðaryfirlögregluþjónn, staðfesti í samtali við sunnlenska.is að mál af þessu tagi hefði verið kært til lögreglu. Sá köttur hafi verið týndur í tvær vikur en fannst síðan heill á húfi við Kjarr í Ölfusi. Þorgrímur segir að grunur leiki á að kötturinn hafi verið veiddur í minkagildru og er málið rannsakað sem brot á lögum um dýravernd.

Sunnlenska.is hefur fengið staðfest annað tilvik þar sem kettlingur til heimilis í austurbæ Selfoss hvarf, en fannst síðan dauður við Kögunarhól í Ölfusi þar sem ekið hafði verið á hann. Eigendur kettlingsins höfðu samband við mann sem grunaður er um verknaðinn og viðurkenndi hann fúslega fyrir þeim að hafa veitt köttinn og ekið honum út fyrir bæinn.