Lögfræðiálit vekur alvarlegar spurningar um lögmæti náttúrupassa

Á Þingvöllum. Mynd úr safni. sunnlenska.is/Guðmundur Karl

Oddvitar sveitarfélaganna fjögurra í Uppsveitum Árnessýslu: Bláskógabyggð, Hrunamannahreppi, Grímsnes- og Grafningshreppi og Skeiða- og Gnúpverjahreppi vara við því að fyrirhuguð gjaldtaka á ferðamenn á Gullna hringnum kunni að brjóta gegn EES-samningnum.

Sveitarfélögin fjögur í Uppsveitum Árnessýslu hafa látið vinna óháð lögfræðiálit um fyrirhugað náttúru- og innviðagjald sem ríkisstjórnin hyggst innleiða á Gullna hringnum.

Niðurstöður álitsins vekja alvarlegar spurningar um lögmæti fyrirhugaðrar gjaldtöku gagnvart skuldbindingum Íslands samkvæmt EES-samningnum. Þegar kemur að mismunun á forsendum þjóðernis og ákvæðum um þjónustufrelsi. Gjaldtakan geti skapað ríkisjóði bótaskyldu.

Oddvitarnir telja að stjórnvöld verði að taka þessar niðurstöður alvarlega áður en frumvarpið verður lagt fram á Alþingi. Það sé með öllu óásættanlegt að lögfesta gjaldtöku sem verulegur vafi leiki á að standist alþjóðlegar skuldbindingar Íslands.

„Gjaldtakan verður að vera lögmæt, sanngjörn, byggð á vandaðri greiningu og hafa fyrirvara sem er ásættanlegur fyrir þá aðila sem starfa í ferðaþjónstu. Það gengur ekki að ríkisstjórnin ætli að innleiða nýja skattheimtu á ferðaþjónustuna án þess að tryggja fyrst að hún standist EES-samninginn,“ segir í tilkynningu frá þeim Guðmundi Finnbogasyni, Haraldi Þór Jónssyni, Helga Kjartanssyni og Jóni Bjarnasyni.

Oddvitarnir fjórir skora á ríkisstjórnina að endurskoða fyrirhugaða gjaldtöku og tryggja að fyrir liggi fullnægjandi lögfræðilegt mat og áhrifagreining áður en málið heldur áfram í þinglega meðferð.

Lögfræðiálit um fyrirhugað náttúru- og innviðagjald

Fyrri greinJólamarkaður MFÁ hefst á fimmtudaginn