Héraðsdómur Suðurlands úrskurðaði í dag, að kröfu lögreglustjórans á Suðurlandi, íslenskan karlmann fæddan 1997 í farbann til kl. 16:00 19. desember næstkomandi.
Maðurinn var handtekinn að kvöldi 7. nóvember síðastliðinn þar sem hann var einn á vesturleið á Suðurlandsvegi um Mýrdalssand á vanbúinni bifreið.
Athugull lögreglumaður áttaði sig fljótlega á því að fleira vantaði uppá því maðurinn reyndist próflaus og undir áhrifum fíkniefna.
Við leit í bifreiðinni fundust tæp 6 kíló af hassi sem maðurinn kannaðist við að vera að flytja en vildi að öðru leiti ekki skýra tilvist þeirra.
Maðurinn var úrskurðaður í gæsluvarðhald sem átti að renna út kl. 16:00 á morgun en ekki þótti tilefni til að halda honum lengur vegna rannsóknarinnar og var hann því látinn laus í dag en úrskurðaður í farbann eins og áður sagði.
Áfram er unnið að rannsókn málsins, m.a. um uppruna efnanna og mun lögreglan ekki veita frekari upplýsingar um gang hennar að sinni.