Sveitarfélagið Árborg er fyrsta sveitarfélag landsins til að láta taka loftmyndir með dróna af öllu sveitarfélaginu. Efla hefur lokið þessu umfangsmikla verkefni fyrir Árborg, en alls ná myndirnar yfir um 156 ferkílómetra og voru teknar á tímabilinu 2024–2026.
Efla hefur jafnframt tekið við rekstri vefsjár fyrir Árborg og geta íbúar og aðrir áhugasamir nú skoðað loftmyndirnar á vef sveitarfélagsins á slóðinni kort.is/arborg. Myndirnar veita skýra og uppfærða yfirsýn yfir byggð, landnotkun og þróun sveitarfélagsins.
Framvegis mun Efla fljúga árlega með drónum og uppfæra loftmyndir eftir þörfum, þannig að vefsjáin endurspegli á hverjum tíma nýjustu breytingar og framkvæmdir í sveitarfélaginu.
Einnig er hægt að fylgjast með framkvæmdum við nýju Ölfusárbrúna í vefsjánni. Frá og með september 2025 hafa framkvæmdirnar verið myndaðar mánaðarlega og eru þær myndir aðgengilegar á vef sveitarfélagsins.
Ýmsar upplýsingar birtast á vefsjánni; svo sem teikningar af byggingum, allar helstu veitur innan sveitarfélagsins, þjónusta og afþreying. Kortið er í stöðugri þróun og þar verður hægt að fá tengingar við Skipulagsstofnun og lóðagrunn HMS svo fátt eitt sé nefnt.