Herjólfur siglir ekki í Landeyjahöfn í dag og óvíst er með fleiri ferðir síðdegis en skipið er nú á leið frá Þorlákshöfn til Vestmannaeyja.
Lóðsbátur Vestmannaeyjahafnar sat fastur um stund í innsiglingunni að Landeyjahöfn í morgun en lónar nú fyrir utan og bíður eftir því að það falli betur að.
Sérfræðingur frá Siglingastofnun er um borð í Lóðsinum sem hefur kannað aðstæður í morgun. Á mbl.is segir Sveinn Rúnar Valgeirsson að þeir hafi farið inn og út og kennt grunns í öll skiptin en þegar Lóðsinn hafi stoppað í eitt skiptið hafi hann ákveðið að bíða eftir flóði.