Lítil nýliðun í landbúnaði áhyggjuefni

Lítil nýliðun í landbúnaði á sama tíma og tækifærin blasa við í atvinnugreininni er áhyggjuefni í Skaftárhreppi en miklir möguleikar eru til að styrkja megin atvinnugreinarnar í hreppnum, landbúnað og ferðaþjónustu.

Þetta voru helstu skilaboð íbúaþings sem haldið var á Kirkjubæjarklaustri nýverið. Þar kom fram að efling ferðaþjónustu veltur á lengingu ferðamannatímans og í landbúnaði eru margvísleg tækifæri í fullvinnslu og markaðssetningu afurða. Hinsvegar hamli skortur á íbúðar- og atvinnuhúsnæði uppbyggingu. Meðal þess sem heimamenn vilja sjá eru bætt fjarskipti, þrífasa rafmagn til sveita og bætt vegakerfi.

Guðmundur Ingi Ingason, oddviti Skaftárhrepps segir jákvætt að íbúar taki þátt í mótun framtíðarinnar en fréttir af því að þekkingarsetur væri sett í bið hafi verið ákveðið reiðarslag.

„Við höfum verið ansi þolinmóð og ekki stappað niður fótunum, en við vonumst til að þetta verði ekki slegið af,“ segir Guðmundur Ingi.