Undanfarna sólarhringa hefur rafleiðni í Múlakvísl hækkað jafnt og þétt og er orðin óvenju há miðað við árstíma en hún mælist um 286 míkróS/cm. Leiðnimælingar segja til um magn jarðhitavatns í ám og há gildi benda til þess að lítið jökulhlaup sé í gangi.
Þetta kemur fram í tilkynningu frá Veðurstofunni en að svo stöddu hefur vatnshæð í ánni ekki hækkað samhliða leiðniaukningunni. Mögulegt er að það geti gerst á næstu dögum.
Mikil gasmengun
Hlaup af þessari stærðargráðu eru vel þekkt í Múlakvísl. Mikil gasmengun fylgir hlaupinu að þessu sinni, en Veðurstofan er með gasmæli við Láguhvola sem eru um 2 km frá jökuljaðri Kötlujökuls. Í nótt mældist brennisteinsvetni (H2S) þar yfir heilsuverndarmörkum. Því er varhugavert að staldra við nálægt ánni eða vera nálægt upptökum hennar við jökuljaðarinn.
Hægviðri undanfarna daga eykur einnig hættuna á að gas safnist fyrir í lægðum. Ef fólk finnur fyrir einkennum, svo sem sviða í nefi eða augum, á að yfirgefa svæðið strax.
