Þann 8. apríl síðastliðinn var lokahátíð Stóru upplestrarkeppninnar fyrir grunnskólana í Rangárvalla- og Vestur-Skaftafellssýslu og Grunnskóla Vestmannaeyja haldin í Hvolsskóla á Hvolsvelli.
Skólarnir sex sem þátt tóku í lokahátíðinni voru Grunnskólinn á Hellu, Grunnskóli Vestmannaeyja, Hvolsskóli, Kirkjubæjarskóli, Laugalandsskóli og Víkurskóli.
Keppendur voru þrettán talsins, en að auki var nokkur fjöldi gesta viðstaddur hátíðina, meðal annars foreldrar keppenda og kennarar skólanna, auk annarra góðra gesta.
Nemendur Hvolsskóla úr valinu Þjóðleikur fluttu lög úr leikritinu Dúkkulísu, milli þess sem keppendur lásu upp ljóð og sögu og í hléi voru bornar fram glæsilegar kaffiveitingar.
Keppendurnir þrettán stóðu sig með mikilli prýði og var dómurum vandi á höndum að gera upp á milli allra þessara góðu lesara.
Á endanum urðu úrslitin þau að Lilja Dögg Ágústsdóttir, Hvolsskóla, varð í 1. sæti, Gabríel Ari Davíðsson, Grunnskóla Vestmannaeyja í 2. sæti og Sunna Hlín Borgþórsdóttir, Laugalandsskóla í 3. sæti.