Í þessari viku hafa verið þemadagar í Stekkjaskóla á Selfossi sem lauk svo með opnu húsi og markaðsdegi í gær, fimmtudag.
Á þemadögum breyttist Stekkjaskóli í Stekkjabæ þar sem nemendur skólans völdu sér vinnustað til að vinna á þessa þrjá daga. Markmið Stekkjabæjar var að líkja eftir lýðræðissamfélagi þar sem nemendur leika aðalhlutverkið.
Hugmyndin að Stekkjabæ er fengin frá Barnaskólanum á Eyrarbakka og Stokkseyri þar sem sambærilegt verkefni, sem kallast Barnabær, hefur verið í þróun frá árinu 2011. Verkefnið er hugsað til að efla foreldrasamstarf við skólann, auka ánægju nemenda og kennara og efla fjölbreytileikann í skólastarfinu.
Með sinn eigin gjaldmiðil
Þemadagarnir gáfu nemendum innsýn inn í atvinnulífið og þátttöku í samfélaginu en nemendur sóttu rafrænt um starf með aðstoð forráðamanna sem þeir völdu eftir áhugasviði og hæfni. Á lokadeginum, fimmtudaginn 30. apríl, fengu nemendur útborguð laun – svokallaðar Stekkjakrónur – fyrir vinnuframlag, í formi inneignarkorts sem þau gátu notað til að kaupa varning eða þjónustu innan bæjarins. Foreldrar og aðrir aðstandendur sem heimsóttu skólann í gær gátu einnig keyptu Stekkjakrónur sem þeir notuðu svo til að kaupa vörur á hinum ýmsum mörkuðum Stekkjabæjar.
„Þetta er búið að ganga framar vonum. Þetta er búið að vera alveg frábært. Mjög margir sem hafa komið hérna og það er svo mikið líf hérna í skólanum, þetta er svo flott sveitarfélag – Stekkjabær,“ sagði Hilmar Björgvinsson, skólastjóri Stekkjaskóla, í samtali við sunnlenska.is þegar blaðamaður leit við í gær.
Fyrsta skólablað Stekkjabæjar
Í Stekkjabæ var hægt að kaupa myndir, blóm og plöntur, armbönd, ávaxtaskálar og pizzasnúða – svo fátt eitt sé nefnt. Fyrsta skólablað skólans,
Stekkjafréttir, var einnig til sölu en efni blaðsins var alfarið unnið af nemendum skólans. Margt af því sem var til sölu í Stekkjabæ seldist upp á skammri stundu, eins og til dæmis leirinn og múslíið og er óhætt að segja viðtökurnar hafi verið framar vonum á þessum fyrsta markaðsdegi Stekkjabæjar.
„Það var hérna alveg ofsaleg örtröð milli klukkan níu og tíu, þannig að það var margt sem seldist upp svona einn, tveir og þrír,“ segir Hilmar.
Samvinna og samkennd
Hilmar var í skýjunum með markaðsdaginn og þær góðu viðtökur sem hann fékk. „Krakkarnir eru búnir að vera svo dugleg. Þau hafa verið á allskonar stöðvum og eru svo listræn og vandvirk við allt sem þau hafa verið að gera. Áhuginn hefur verið alveg ofsalega mikill. Þau hafa bara blómstrað, finnst mér. Líka bara þessi samvinna og samkennd þessa daga, það eru allir einhvern veginn að vinna saman, yngstu og eldri krakkarnir, blandað í hópa.“
„Það er miklu meira líf hérna í dag en ég átti von á. Þetta er bara eins og heilt bæjarfélag, bæjarhátíð í Stekkjabæ. Bæði nemendur og starfsmenn hafa sýnt ótrúlegan dugnað og eljusemi þessa daga og afraksturinn er miklu meiri en maður hefði getað vonast fyrirfram. Þetta er mjög vel heppnað,“ segir Hilmar að lokum.
