Lið Fjölbrautaskóla Suðurlands varð í 5. sæti í Boxinu, framkvæmdakeppni framhaldsskólanna, en úrslitakeppnin fór fram í Háskólanum í Reykjavík um síðustu helgi.
Átta lið komust í úrslitakeppnina og að lokum var það lið Menntaskólans á Akureryri sem fór með sigur af hólmi. Aðeins skildu sex stig að liðin í 2.-5. sæti og úrslitin réðust ekki fyrr en í lokaþraut.
Í úrslitunum fóru fimm manna lið frá hverjum skóla í gegnum fjölbreytta þrautabraut sem reyndi á bæði á hugvit og verklag. Liðin fóru á milli stöðva og fengu hálftíma til að leysa hverja þraut.
Í liði FSu voru þau Sverrir Heiðar Davíðsson, Halldóra Íris Magnúsdóttir, Anna Guðrún Þórðardóttir, Guðmundur Bjarnason og Þórir Gauti Pálsson. Þau stóðu sig firna vel, unnu m.a. með glæsibrag þraut sem snerist um að koma beinni sjónvarpsútsendingu í loftið með öllu tilheyrandi og hlutu sérstaka viðurkenningu frá Jáverk fyrir brúarsmíð. Ágústa Ragnarsdóttir, myndlistarkennari, hefur yfirumsjón með Boxinu fyrir hönd FSu.
Að Boxinu standa Samtök iðnaðarins, Háskólinn í Reykjavík og Samband íslenskra framhaldsskólanema. Markmiðið með Boxinu er að kynna og vekja áhuga nemenda í framhaldsskólum á verk- og tækninámi og fjölbreyttum störfum í iðnaði.