Lið Herkúlesar sigraði Flóafár

Lið Herkúlesar sigraði hið árvissa Flóafár sem fór fram fyrr í dag í Fjölbrautaskóla Suðurlands á Selfossi.

Í Flóafári keppa lið undir stjórn nemenda í þrautum sem starfsmenn skólans útbúa. Keppt er um stig fyrir þrautarlausnir og að klára á góðum tíma. Skólinn allur er undirlagður, hver krókur og kimi notaður og mikill metnaður hjá öllum liðum að vera með flottan heildarsvip, útbúa sitt svæði, halda góðum liðsanda, semja skemmtiatriði og skipuleggja sig vel.

Fimm lið tóku þátt að þessu sinni, hvert með sinn einstaka stíl, Herkúles, Team rock it, BMS (Blue Mountain State), Lion King og Mexicano. Sem fyrr sagði sigraði lið Herkúlesar, en í 2. sæti varð liðið BMS. Veittar voru sérstakar viðurkenningar fyrir ákveðin atriði: Lið Mexicano sigraði í borðalagningu, besta herópið átti liðið Team rock it, besta svæðið átti liðið BMS, bestan heildarsvip hafði lið Herkúlesar og lið Lion King var með besta skemmtiatriðið.

Starfsmenn keppa svo innbyrðis um besta búninginn, en það voru þær Gurrí og Brynja sem fengu viðurkenningu fyrir glæsilega draugabúninga.

Keppnin fór einstaklega vel fram, allir stóðu sig mjög vel og dagurinn góður endir á vel heppnaðri viku með kæti og gleði að leiðarljósi eins og FSu-ingum er tamt.


Gurrí og Brynja fengu verðlaun fyrir bestu búningana meðal kennara. Sunnlenska.is/Örn Óskarsson.