Manneskjan sem flutt var á Landspítalann í gærkvöldi eftir að hafa fallið í Ölfusá er látin. Þetta kemur fram í tilkynningu frá lögreglunni á Suðurlandi.
Tildrög þess að viðkomandi hafnaði í ánni eru til rannsóknar hjá rannsóknardeild lögreglunnar á Suðurlandi.
Lögreglan fékk tilkynningu um klukkan 19 í gærkvöldi um manneskju sem fallið hafði í ána og fannst hún eftir stutta leit neðar í ánni. Lögregla, sjúkralið, björgunarsveitir og þyrla Landhelgisgæslunnar brugðust við á hæsta forgangi. Þyrla Landhelgisgæslunnar lenti á Selfossflugvelli um klukkan 20:15 í gærkvöldi og flutti viðkomandi til aðhlynningar á neyðarmóttöku Landspítala háskólasjúkrahús í Reykjavík.