Skömmu fyrir hádegi í dag barst lögreglunni á Suðurlandi tilkynning þess efnis að maður hefði ekki skilað sér til vinnu eftir páska. Síðast hafði heyrst af honum á páskadag og hafði hann þá ætlað að ganga að Baldvinsskála á Fimmvörðuhálsi.
Lögreglan hóf þegar eftirgrennslan og fann bifreið mannsins á bifreiðastæði við Skóga. Í framhaldi var ákveðið að ræsa út björgunarsveitir á svæðinu til leitar ásamt þyrlu Landhelgisgæslunnar til aðstoðar.
Það var svo um klukkan 16 að áhöfn þyrlu Landhelgisgæslunnar fann manninn látinn skammt frá Baldvinsskála. Maðurinn, sem var á sextugsaldri, var af erlendu bergi brotinn en búsettur á Íslandi.
Lögreglan á Suðurlandi fer með rannsókn málsins en ekki er talið að andlátið hafi borið að með saknæmum hætti. Veður á Fimmvörðuhálsi hefur verið lélegt síðustu daga og aðstæður til göngu á því svæði ekki góðar.