Í gær barst Neyðarlínunni aðstoðarbeiðni í gegnum Garmin miðstöðina í Bandaríkjunum, eftir að tveir skíðagöngumenn höfðu virkjað neyðarboð í staðsetningartæki sínu. Staðsetning þeirra var við Hreysiskvísl í Ásahreppi, töluvert norðan Þórisvatns á Spengisandsleið.
Gul veðurviðvörun var í gildi á hálendinu og óvíst um færð og því var fyrsta viðbragð nokkuð stórt, en kallaðar voru út sveitir frá Þjórsá í vestri að Skaftártungum og einnig voru kallaðar út áhafnir snjóbíla á Suðurlandi.
Fyrstu bílar voru fljótlega komnir á þær slóðir að ljóst var að færðin yrði ekki til trafala og ljóst á þeim tímapunkti að fólkið hafði leitað skjóls í gömlu neyðarskýli sem Slysavarnafélag Íslands, eitt þeirra félaga sem sameinuðust í Slysavarnafélagið Landsbjörg, lét reisa fyrir um 60 árum. Viðbragð snjóbílaáhafna var þá afturkallað og stefndu fjallajeppar Flugbjörgunarsveitarinnar á Hellu og Björgunarsveitarinnar Dagrenningar á Hvolsvelli að neyðarskýlinu.
Símasamband var við fólkið, erlent par, og höfðu þau leitað skjóls í neyðarskýlinu eftir að hafa verið fimm daga á göngu frá Akureyri. Annað þeirra var þá orðið nokkuð þrekað og möguleg kalsár í andliti.
Eftir um tveggja tíma ferð komu fyrstu björgunarmenn að Hreysiskvísl rétt fyrir klukkan 12 á hádegi. Fólkið var tekið inn í hlýjan bílinn og búnaður þeirra sömuleiðis.
Fólkið var svo flutt á Heilsugæsluna á Hellu til aðhlynningar þangað sem komið var rétt upp úr klukkan 14 í gær.