Lögregla og björgunarsveitir leituðu á og við Ölfusá í kvöld eftir að bakpoki fannst á árbakkanum ofan við Ölfusárbrú.
Vegfarandi fann pokann og skilaði honum inn til lögreglu en pokinn var þá búinn að liggja á árbakkanum í meira en klukkustund. Talsvert af útivistarbúnaði var í bakpokanum en ekkert sem gat gefið til kynna hver eigandinn væri.
Ákveðið var að fá sporhund frá Björgunarsveit Hafnarfjarðar, til að fara um svæðið í kringum bakpokann, auk þess sem straumvatnsbjörgunarflokkur frá björgunarsveitinni Árborg var kallaður út til að skoða svæði neðan við Ölfusárbrú.
Á þessum tímapunkti lágu ekki fyrir upplýsingar um að nokkur hefði fallið í ána heldur var eingöngu um varúðarráðstöfun að ræða.
Leit var síðan hætt á ellefta tímanum í kvöld þegar eigandi bakpokans komst í leitirnar. Þar var um að ræða erlendan ferðamann sem skildi bakpokann eftir við ána áður en hann fékk sér langan göngutúr.