Björgunarsveitir leituðu bakka Þingvallavatns í gær, sunnudag, að belgískum ferðamanni sem talinn er hafa drukknað í vatninu þann 10. ágúst sl.
Maðurinn hafði verið við siglingar á uppblásnum kayak sem fannst þennan dag ásamt bakpoka mannsins.
Í gær fannst ekkert sem talið er tengjast leitinni að manninum.
Sáu klett sem líktist mannslíkama
Búið er að fara yfir þau gögn sem fengust með sónarleit í vatninu og var eitt atriðið skoðað með kafbát í framhaldi af því en þar reyndist klettamyndun sem sást á gögnunum líkjast mannslíkama að stærð og lögun.
Lögreglan mun funda með svæðisstjórn Björgunarsveita og ákærusviði um aðgerðina í heild og rannsókn málsins á næstu dögum.