Um klukkan 19 laugardaginn 11. janúar síðastliðinn varð árekstur við gatnamót Þorlákshafnarvegar og Eyrarbakkavegar.
Ökumaður grárrar Opel Corsa bifreiðar ók suður Þorlákshafnarveg og ætlaði að beygja inn á Eyrarbakkaveg þegar annarri bifreið var ekið aftan á Opelinn.
Ökumaður bifreiðarinnar sem ók aftan á Opel bifreiðina stöðvaði bifreið sína í 1 til 2 sekúndur en hélt síðan áfram ferð sinni í átt að Þorlákshöfn án þess að ræða við ökumann hinnar bifreiðarinnar.
Ekki náðist skráningarnúmer bifreiðarinnar sem lenti aftan á en talið að það hafi verið ljós Subaru og nokkur hávaði frá pústi hennar.
Lögreglan á Selfossi biður ökumann þessarar bifreiðar sem og þá sem veitt geta upplýsingar um málið að hafa samband í síma 480 1010.