Björgunarsveitir Slysavarnafélagsins Landsbjargar hafa verið kallaðar út vegna manns sem velti yfir sig fjórhjóli ofan við Mörtungu, rétt austan við Kirkjubæjarklaustur.
Maðurinn, sem var einn á ferð í smalamennsku, náði að hringja eftir aðstoð en var ekki viss um nákvæma staðsetningu sína. Ekki næst í hann í síma þessa stundina en símasamband er slitrótt á svæðinu.
Þar sem leita getur þurft að honum voru fjórar björgunarsveitir á svæðinu kallaðar út og eru nú á leið á staðinn.