Nú stendur yfir leit að asískri konu sem saknað er í Eldgjá á Fjallabaksleið nyrðri. Konan kom með hópi ferðamanna í rútu á staðinn.
Stoppað var í Eldgjá í klukkustund en þegar halda átti til baka skilaði hún sér ekki og hefur ekkert til hennar spurst síðan.
Bílstjóri rútunnar beið hennar í um klukkustund áður en ferðinni var haldið áfram. Lét hann lögreglu vita og var hafin eftirgrennslan skömmu síðar.
Í dag hefur Björgunarsveitin Stjarnan úr Skaftártungu farið um svæðið á bílum og fjórhjólum og kannað alla slóða í kring og upp með ánni. Nú hafa allar sveitir í Rangárvalla- og Vestur-Skaftafellssýslu verið kallaðar til leitar.
Ekki er talið loku fyrir það skotið að konan hafi fengið far með öðrum af svæðinu.
Ef einhver hefur verið á ferðinni á þessu svæði í dag og tekið konuna upp í bílinn hjá sér er sá hinn sami beðinn um að hafa samband við lögregluna á Hvolsvelli í síma 488-4110.
Konan er 20-30 ára, dökkklædd með litla ljósa hliðartösku. Hún er um 160 cm á hæð og talar góða ensku.
Þeir sem hafa einhverjar upplýsingar um ferðir konunnar eru vinsamlegst beðnir að hafa samband við lögregluna á Hvolsvelli.
UPPFÆRT KL. 23:30: Leit að konunni hefur ekki borið árangur og hefur henni verið frestað til morguns. Lögreglan hefur ekki fengið neinar vísbendingar um ferðir konunnar.