Leitað að sakamanni í Árnessýslu

Lögreglan á Selfossi leitaði í dag manns í Árnessýslu í tengslum við lögreglurannsókn í Reykjavík vegna brota á almennum hegningarlögum.

Mikill fjöldi lögreglumanna leitaði mannsins, auk þess sem þyrla Landhelgisgæslunnar tók þátt í leitinni. Leit er hætt, en maðurinn er ófundinn.

Lögreglan á Selfossi vill ekki tjá sig um málið og vísar á lögregluna á höfuðborgarsvæðinu, sem vill heldur ekki tjá sig.

Á mbl.is er greint frá því að bílar hafi verið stöðvaðir við Kerið í dag, þar sem mannsins var á einhverjum tímapunkti leitað. Samkvæmt heimildum sunnlenska.is var lögreglan og sérsveitarmenn einnig á ferðinni í Vaðnesi í Grímsnesi.

Þá segja sjónarvottar að þrír lögreglubílar, sjúkrabíll og þyrla Landhelgisgæslunnar hafi verið við Laugavatn í dag. Þar hafi lögreglumenn stöðvað alla bíla og leitað í þeim hátt og lágt.