Leitað að göngukonu að Fjallabaki

Björgunarsveitir Slysavarnafélagsins Landsbjargar á Suðurlandi voru kallaðar út um hádegisbil í dag til leitar að göngukonu sem varð viðskila við ferðafélaga sína í friðlandinu að Fjallabaki þar sem hún var í för með gönguhópi.

Rigningarúði og þoka er á leitarsvæðinu og skyggni takmarkað, eða um 150 metrar.

Óskað hefur verið eftir að þyrla Landhelgisgæslunnar komi á svæðið og aðstoði við leitina ef tækifæri gefst.

UPPFÆRT KL. 14:24: Konan er fundin. Björgunarsveitarfólk af Suðurlandi, um 40 talsins, tók þátt í leitinni þar sem meðal annars var notast við hunda. Konan fannst skammt frá Hólaskjóli og nýtur nú aðhlynningar björgunarsveitafólks en líðan hennar var ágæt en rigning var á svæðinu og nokkuð dimm þoka.