Leitað að þýskum ferðamanni

Sleðamenn frá Flugbjörgunarsveitinni á Hellu eru á leið norður fyrir Vatnajökul að leita að þýskum ferðamanni sem saknað er þar.

Maðurinn, sem er á göngu á svæðinu, var í SMS sambandi við fjölskyldu sína í Þýskalandi í gær en hann var þá staddur í Nýjadal, mitt á milli Hofsjökuls og Tungnafellsjökuls. Ætlaði hann að vera aftur í sambandi í dag en ekkert hefur heyrst frá honum.

GSM sími mannsins kom inn á GSM sendi í Nýjadal í morgun. Reynt hefur verið að hringja í símann en enginn svarar.

Sleðamenn frá Flugbjörgunarsveitinni á Hellu og Súlum á Akureyri eru á leið á svæðið og munu kanna skála og helstu leiðir. Beri það ekki árangur verður skipulögð stærri leit á morgun.