Björgunarsveitir hafa leitað við Álftavatn og Sogið frá því á ellefta tímanum í kvöld eftir að mannlaus bátur fannst á Álftavatni. Óttast var að þar hafi bátsverjar fallið frá borði. Leit var hætt eftir miðnætti en ekkert fannst og engin verksummerki eru um að fólk hafi verið í bátnum.
Búið er að hafa uppi á eiganda bátsins og ekki er talið að einhver á hans vegum hafi verið á bátnum en möguleiki var á að aðrir hafi nýtt bátinn.
Í tilkynningu frá Landsbjörgu segir að líklegt sé að báturinn hafi losnað, eða verið losaður og ýtt frá landi. „Sé það raunin væri það sorglegur grikkur,“ segir í tilkynningunni.
Um 50 björgunarsveitarmenn voru við leit á svæðinu, mikil þoka er í Grímsnesinu en aðstæður til leitar voru góðar.
