Leikskólalist í Bónus

Dagur leikskólans er haldinn hátíðlegur í leikskólum landsins í dag og af því tilefni hefur staðið yfir myndlistarsýning í Bónus á Selfoss með verkum barna á Jötunheimum.

6. febrúar er merkisdagur í íslenskri leikskólasögu því þann dag árið 1950 stofnuðu frumkvöðlar leikskólakennara fyrstu samtök sín.

Dagur leikskólans er nú haldinn í fimmta sinn en hann er samstarfsverkefni Félags leikskólakennara, Félags stjórnenda leikskóla, mennta- og menningarmálaráðuneytis, Sambands íslenskra sveitarfélaga og Heimilis og skóla.

Tilgangurinn er að auka jákvæða umræðu um leikskólann, vekja umræðu um hlutverk leikskóla og starf leikskólakennara og kynna starfsemina út á við.