Vistunargjöld í leikskólanum Undralandi á Flúðum hafa verið felld niður fyrir börn í elsta árgangi, sem eiga lögheimili í Hrunamannahreppi. Breytingin tók gildi núna um áramótin.
Foreldrar taka áfram þátt í fæðiskostnaði í samræmi við samþykkta gjaldskrá.
Þann 1. september næstkomandi verða vistunargjöld felld niður á þau börn sem fara í grunnskóla að ári en áætlanir H-listans, í meirihluta hreppsnefndar, fela í sér afnám leikskólagjalda í áföngum þannig að hann verði gjaldfrjáls að fullu haustið 2024.
Systkinaafslætti hefur einnig verið breytt og er hann nú 50% en ekki er lengur frítt fyrir þriðja barn. Þá greiða börn með lögheimili utan sveitarfélagsins fullt vistunargjald í leikskólann.