Aðalfundur Bárunnar, stéttarfélags, sem haldinn var í gær, lýsir yfir áhyggjum af bágri stöðu starfsfólks í leikskólum. Samkvæmt niðurstöðu Vörðu Rannsóknarstofnun vinnumarkaðarins er staðan mjög slæm.
„Þegar nær helmingur leikskólastarfsmanna getur ekki staðið undir óvæntum 100 þúsund króna útgjöldum, þriðjungur býr við félagslegan og efnislegan skort og fjórir af hverjum tíu mælast með slæma andlega heilsu, þá er ekki lengur hægt að tala um tímabundinn vanda eða einstaklingsbundin vandamál. Þetta er kerfisbundið láglaunamisrétti gagnvart starfsstétt sem heldur uppi einni mikilvægustu grunnstoð samfélagsins,“ segir í ályktun sem samþykkt var á fundinum.
Fundurinn vitnar í skýrsluna þar sem fram kemur svart á hvítu að fólk sem sinnir umönnun og uppeldi yngstu barna landsins býr við verri kjör, meiri fjárhagsáhyggjur, lakari húsnæðisstöðu og verri andlega heilsu en annað launafólk.
„Það eitt og sér ætti að teljast neyðarástand í opinberri þjónustu. Þegar starfsfólk hefur ekki efni á félagslífi barna sinna, næringarríkum mat eða nauðsynlegum fatnaði fyrir fjölskylduna sína, þá eru launin einfaldlega of lág til að lifa mannsæmandi lífi,“ segir í ályktuninni og því er bætt við að þetta útskýri líka þann mannekluvanda sem sveitarfélög glíma við í leikskólum.
„Ef sveitarfélög bregðast ekki við þessum niðurstöðum með raunverulegri uppbyggingu starfsumhverfis leikskóla, þá er verið að samþykkja að láglaunafólk í einni mikilvægustu þjónustu samfélagsins búi við stöðugan fjárhagslegan og andlegan óstöðugleika. Það er pólitísk ákvörðun — ekki náttúrulögmál,“ segir ennfremur í ályktun aðalfundar Bárunnar.