Lárus Jónsson, íþróttafræðingur og körfuknattleiksþjálfari, er nýr oddviti bæjarmálafélagsins Okkar Hveragerði fyrir komandi sveitarstjórnarkosningar.
„Ég vil að framtíðarsýn Hveragerðis einkennist af jákvæðum og uppbyggilegum samskiptum og stuðli markvisst að jöfnum tækifærum og velferð fólks. Sú reynsla sem ég hef öðlast í gegnum lífið hefur ekki síst kennt mér að mæta nýjum og krefjandi verkefnum af yfirvegun. Í stækkandi bæjarfélagi reynir á fagmennsku, ráðdeild í rekstri og hugrekki þeirra sem fara með stjórn,“ segir Lárus, sem er íþróttafræðingur og kennari með meistaragráðu í stjórnmálafræði á sviði alþjóðasamskipta.
Hann segist þakklátur fyrir traustið sem honum er falið sem oddviti Okkar Hveragerðis en listi framboðsins verður kynntur næstkomandi laugardag, þann 28. mars kl. 10:00 í Reykjadalsskála.
Okkar Hveragerði var sigurvegari kosninganna í Hveragerðisbæ vorið 2022 og framboðið myndaði meirihluta á yfirstandandi kjörtímabili ásamt Frjálsum með Framsókn.