Langþráð heimavist opnuð fyrir nemendur FSu

Við undirritun samningsins í dag (f.v.) Einar Freyr Elínarson, formaður starfshóps SASS, Valdimar Árnasonar, framkvæmdastjóri Selfoss Hostel, Lilja Dögg Alfreðsdóttir, mennta- og menningarmálaráðherra og Olga Lísa Garðarsdóttir, skólameistari FSu. Ljósmynd/SASS

Í dag var undirritaður samningur milli Fjölbrautaskóla Suðurlands og Valdimars Árnasonar, eiganda Selfoss Hostel, um að rekin verði heimavist fyrir fjölbrautaskólann að Austurvegi 28 Selfossi.

Samningurinn er afrakstur vinnu starfshóps sem skipaður var af stjórn Samtaka sunnlenskra sveitarfélaga í janúar í fyrra. Í hópnum sátu Einar Freyr Elínarson oddviti Mýrdalshrepps og formaður hópsins, Anton Kári Halldórsson oddviti Rangárþings eystra, Sandra Brá Jóhannsdóttir sveitarstjóri Skaftárhrepps og Nói Mar Jónsson tilnefndur af Ungmennaráði Suðurlands.

Starfshópurinn lagði ályktun fyrir stjórnir allra sveitarfélaga sem hlut eiga í skólanum. Þar var skorað á skólanefnd og stjórnendur skólans til að vinna að uppbyggingu heimavistar og á mennta- og menningarmálaráðherra að beita sér í málinu. Ályktunin var samþykkt samhljóða í öllum sveitarstjórnum og í kjölfarið hófst vinna í ráðuneytinu.

Henni lauk í maí síðastliðnum með ákvörðun ráðherra um að kannaður yrði möguleikinn á því að leigja húsnæði á Selfossi og starfrækja þar heimavist við FSu og var það gert með skólameistara og skólanefnd skólans.

Nú hefur það verið gert og fram að áramótum verða í boði tíu herbergi á vistinni en árið 2021 verða þau 15. Heimavistin er hugsuð fyrir nemendur sem ekki hafa tækifæri til að nýta almenningssamgöngur til að mæta í skólann. Fyrstu nemendurnir munu flytja inn á vistina strax á morgun.