Landsvirkjun hefur gengið til liðs við nýsköpunarhátíðina Uppsprettu Suðurlands og verður einn helsti bakhjarl hennar. Samkomulag þess efnis var undirritað á dögunum.
Uppspretta Suðurlands verður í Ölfusi dagana 6.–7. nóvember næstkomandi og er samstarfsverkefni Samtaka sunnlenskra sveitarfélaga, Háskólafélags Suðurlands og Markaðsstofu Suðurlands. Hátíðin er nýr vettvangur á Suðurlandi þar sem frumkvöðlar, fyrirtæki, fjárfestar og almenningur koma saman til að kynna nýsköpun og verðmætasköpun í atvinnulífi landshlutans.
Sjálfbærni, orka og nýsköpun
Aðkoma Landsvirkjunar að Uppsprettunni fellur afar vel að kjarnastarfsemi og stefnu fyrirtækisins sem leggur ríka áherslu á sjálfbærni, orkutengda nýsköpun og jákvæð samfélagsáhrif í nærsamfélagi sínu.
Jóna Bjarnadóttir, framkvæmdastjóri Samfélags og umhverfis hjá Landsvirkjun, segir orkufyrirtæki þjóðarinnar leggja mikla áherslu á að vera góður granni og styðja við verkefni sem hafa jákvæð samfélagsáhrif.
„Suðurland gegnir lykilhlutverki í íslenskri orkuvinnslu og við viljum styðja við þá fjölbreyttu verðmætasköpun og orkutengdu nýsköpun sem þar á sér stað. Við leggjum okkur fram um að taka virkan þátt í samfélaginu á starfssvæðum okkar.“
Lína Björg Tryggvadóttir, verkefnastjóri hjá SASS, fagnar samstarfinu. „Að fá jafn öflugan aðila til liðs við okkur sýnir trúna á sunnlensku atvinnulífi. Saman ætlum við að skapa suðupott þar sem hugmyndir frumkvöðla og atvinnulífs geta orðið að veruleika,“ segir Lína.
Dagskrá Uppsprettu Suðurlands verður tvískipt, til að hámarka ávinning þátttakenda og gesta. Sérstakur fagdagur og ráðstefna verða föstudaginn 6. nóvember en sýningin verður opin almenningi laugardaginn 7. nóvember.