Benchmark Genetics Iceland í Vogum hefur síðan í desember 2020 séð Landeldi fyrir yfir tveim milljónum laxahrogna til áframeldis á landi. Í vikunni skrifuðu félögin undir þriggja ára áframhaldandi samstarfssamning sem kveður á um að Benchmark útvegi Landeldi öll þau hrogn sem fyrirtækið mun þurfa fram á mitt ár 2025.
„Seiðaeldisstöðin okkar hefur tekið miklum stakkaskiptum og hefur reynst einstaklega örugg og afföll verið afar lág undanfarið eitt og hálft ár. Við þökkum þeim árangri fyrst og fremst gæða afurð frá Benchmark og hinu tæra íslenska lindarvatni sem er virkilega góður eldisvökvi,” sagði Haraldur Snorrason, yfirmaður seiðaeldisins hjá Landeldi.
Á Öxnalæk í Hveragerði hafa um tíu manns starfað við uppbygginguna og senn fer framkvæmdum að ljúka. Stöðin getur annað um 1,8 til 2 milljónum seiða í seiðaframleiðslu á ári og elur alfarið seiði fyrir áframeldisstöð Landeldis í Þorlákshöfn.