Slökkviliðsmenn frá Brunavörnum Árnessýslu voru kallaðir að hesthúsahverfinu á Selfossi síðdegis í gær þar sem eldur hafði kviknað í haug fyrir utan eitt hesthúsanna.
„Við vorum snöggir á staðinn þannig að þetta varð ekki mikið. Helgarvaktin var með froðurennibraut á menningarhátíð heyrnarlausra í Sigtúnsgarðinum þegar útkallið barst, þannig að við vorum fljótir á staðinn. Það var bleytt í haugnum með vatni og þetta reyndist minniháttar,“ sagði Lárus Kristinn Guðmundsson, settur slökkviliðsstjóri, í samtali við sunnlenska.is.
Í gærkvöldi var svo tilkynnt um annan eld í Bláskógabyggð sem reyndist vera varðeldur og síðar um kvöldið voru slökkviliðsmenn á Laugarvatni og Selfossi kallaðir út þegar sumarbústaður við Þingvallavatn brann til kaldra kola.