Kviknaði í út frá gasgrilli

Slökkviliðsmenn frá Brunavörnum Árnessýslu á Laugarvatni voru kallaðir út um klukkan 21 í gærkvöldi þegar eldur kviknaði út frá gasgrilli við sumarhús á Laugarvatni.

Málsatvik voru þau að eldur virðist hafa komist undir grillið og að gaskút sem lak gasi við stútinn. Eldurinn læsti sig í klæðningu og sólpall við grillið. Húsráðandi var búin að ráðast að eldinum með handslökkvitæki en náði ekki að slökkva vegna gaslekans.

Slökkviliðsmenn réðu niðurlögum eldsins á skammri stundu eftir að þeir mættu á staðinn þannig að ekki fór verr og óverulegar skemmdir urðu á eignum.