Íbúar í Flóahreppi munu fá fjölnota innkaupapoka senda inn á heimili sín nú í september í tilefni af „Degi umhverfisins“, sem er þann 16. september.
Sveitarstjórnin samþykkti í febrúar síðastliðnum að fara í samstarf við kvenfélögin þrjú í sveitinni um gerð margnota innkaupapoka fyrir hvert heimili í sveitarfélaginu.
Nú hafa verið saumaðir 210 pokar og þær Ingibjörg Einarsdóttir, Guðrún Elísa Gunnarsdóttir og Sólveig Þórðardóttir, formenn kvenfélaganna í Flóahreppi mættu til síðasta fundar sveitarstjórnarinnar og afhentu formanni Atvinnu- og umhverfisnefndar Flóahrepps, Ingunni Jónsdóttur, pokana.
Sveitarstjórnin færði kvenfélögunum þakkir fyrir gott framlag til umhverfismála en innkaupapokinn er hvatning til íbúa til þess að minnka plastpokanotkun og táknrænt verkefni sem minnir á það hvernig innkaupastjóri hvers heimilis fyrir sig getur stýrt samsetningu heimilissorpsins með vali á neysluvörum í umhverfisvænum umbúðum.