Kveikt í ruslatunnu við ráðhúsið

Slökkviliðsmenn frá Brunavörnum Árnessýslu slökkva eldinn. Ljósmynd/BÁ

Eldur kom upp í ruslatunnu við Ráðhús Ölfus rétt fyrir klukkan eitt í dag. Ruslatunnan stóð upp við bygginguna rétt fyrir neðan glugga þannig að talsverð hætta var á að eldur næði að læsa sig í húsið ef til þess kæmi að glerið springi vegna hita.

Slökkviliðsmenn Brunavarna Árnessýslu í Þorlákshöfn brugðust við útkallinu og slökktu eldinn en áður höfðu starfsmenn sveitarfélagsins og vegfarandi slegið verulega á eldinn með fimm slökkvitækjum.

Einhver reykur komst þó inn í bygginguna sem slökkviliðsmenn ræstu með reykblásurum slökkviliðsins.

Talið er að kviknað hafi í af mannavöldum en Lögreglan á Suðurlandi sér um rannsókn málsins.

Ruslatunnan stóð rétt fyrir neðan glugga þannig að talsverð hætta var á að eldur næði að læsa sig í húsið. Ljósmynd/BÁ