Undanfarna daga hefur gaskútum verið stolið á nokkrum stöðum af gasgrillum íbúa á Selfossi.
Upp úr miðnætti í nótt brá svo við að kveikt var í gaskútum á víðavangi á fjórum stöðum innan bæjarmarka á Selfossi og skammt utan við bæinn. Lögregla og Brunavarnir Árnessýslu slökktu eldana ásamt því að vegfarandi slökkti einn eld.
Í tilkynningu frá lögreglunni á Suðurlandi segir að þeir sem komu að slökkvistarfinu hafi sett sig í töluverða hættu við það að nálgast kútana og þó eldarnir hafi verið kveiktir á berangri getur orðið gríðarlegt eldhaf þegar og ef kútur gefur sig. Ljóst er að veruleg hætta skapaðist af þessu, meðal annars vegna sprengihættu.
Lögreglan skorar á alla þá sem hafa einhverjar upplýsingar um málið að koma þeim til lögreglu í síma 444-2000 í tölvupósti á sudurland@logreglan.is eða á Facebook.