Erlendur maður var kærður fyrir brot á lögum um lax- og silungsveiði á Selfossi í liðinni viku en hann var í leyfisleysi við stangveiðar í Ölfusá.
Lögreglan yfirheyrði manninn sem bar við vankunnáttu á reglum um veiðar í ám á Íslandi. Brot á lögum um lax- og silungsveiði varða sektum eða fangelsi allt að tveimur árum, ef sakir eru miklar.
Frímann Birgir Baldursson, lögregluvarðstjóri á Selfossi og meðstjórnandi Stangaveiðifélags Selfoss, segir í samtali við Vísi að þetta ekki einstakt tilfelli.
„Það hefur gerst nokkrum sinnum á hverju sumri að erlendir menn hafa komið og byrjað að veiða, en svo þegar þeir hafa verið krafðir um veiðileyfi hafa þeir framvísað veiðikortinu og komið alveg af fjöllum með það að það megi ekki veiða hvar sem er með þetta kort.“
Veiðikortið er selt af stangveiðifélagi Reykjavíkur og veitir aðgang að 35 vantasvæðum víðsvegar um landið. Þegar kortið er keypt fylgir því bæklingur sem sem skýrir fyrir eigandanum hvar korthafandi megi renna fyrir fisk, en Ölfusá er ekki að finna á þeim lista.
Frímann segir að í þeim tilfellum sem hann hafi komið að hafi hann haft á tilfinningunni að veiðimennirnir vissu vel að veiðikortið veitti þeim ekki leyfi til að renna fyrir fisk í ánni. „Þetta er bara ein af þessum ástæðum sem þeir reyna að gefa upp, að þeir hafi ekki vitað betur, en það er ekki afsökun að þekkja ekki lögin.“