Krónan mun opna verslun að Hafnarbraut 60 á Höfn í Hornafirði árið 2026 í nýju verslunarhúsnæði. Stefnt er að opnun verslunarinnar, sem verður um 1500 fermetrar að stærð, fyrir næsta sumar eða í síðasta lagi um haustið. Krónan mun því reka 27 verslanir um allt land, þar af tíu á landsbyggðinni.
Markmið Krónunnar með nýrri verslun á Höfn er að veita íbúum og gestum á svæðinu enn betri þjónustu og aðgengi að fjölbreyttu vöruúrvali á sem allra hagstæðasta verði. Þegar fram líða stundir verður einnig boðið upp á heimsendingaþjónustu innanbæjar og til nærliggjandi sveita.
„Okkur hjá Krónunni er sérstaklega kært að tryggja að landsmenn njóti sama úrvals á sama verði, óháð búsetu, hvort sem það er í gegnum Snjallverslun Krónunnar eða í hefðbundinni verslun. Með því að opna á Höfn gerum við íbúum kleift að fá þetta aðgengi og styrkjum um leið þjónustu okkar á landsbyggðinni. Við erum líka stolt af því að taka þátt í áframhaldandi uppbyggingu á Höfn og hlökkum til að leggja samfélaginu lið, meðal annars með því að skapa störf, auka fjölbreytni í vöruúrvali og bæta þjónustuna innan sveitarfélagsins,“ segir Guðrún Aðalsteinsdóttir, framkvæmdastjóri Krónunnar.
Sigurjón Andrésson, bæjarstjóri Hornafjarðar, segir að það sé mikið gleðiefni að fá Krónuna inn í samfélagið á Höfn.
„Ný verslun eykur fjölbreytni og tryggir samkeppni á matvörumarkaði, sem skiptir miklu fyrir íbúa og gesti. Verslunin rís við íbúðabyggðina þar sem ekið er inn í bæinn og verður norðan við nýtt og glæsilegt 200 íbúða hverfi sem tekur á sig mynd á næstu árum. Þetta er til marks um mikla uppbyggingu um allan Hornafjörð, bæði í dreifbýlinu og í þéttbýlinu hér á Höfn – og þann mikla kraft sem samfélagið býr yfir,“ segir Sigurjón.
Í versluninni verður lögð áhersla á ferskleika og góða upplifun fyrir viðskiptavini. Jafnframt verður í boði að skanna og skunda í Krónuappinu fyrir viðskiptavini sem vilja spara sér sporin og hafa betri yfirsýn yfir innkaupin. Auk hefðbundinnar þjónustu verður einnig boðið upp á lausnir fyrir fyrirtæki en slík þjónusta hefur vaxið hratt á síðustu misserum og er í mikilli sókn hjá Krónunni.
Krónan leggur jafnframt mikið upp úr sjálfbærni og umhverfisvænum lausnum. Í nýju versluninni verður meðal annars orkusparandi LED lýsing, lokaðir kælar og frystar knúnir umhverfisvænu kerfi, og grænar innkaupakerrur úr endurunnu plasti sem safnað hefur verið úr sjónum.