Kristín Þórðardóttir, sýslumaður á Suðurlandi, hefur verið skipuð í nýtt embætti sýslumanns og tekur við stöðunni í dag. Frá næstu áramótum verða öll níu sýslumannsembætti landsins sameinuð í eitt.
Sjö sóttu um embættið og tóku ráðherra og ráðuneytisstjóri viðtöl við þá tvo umsækjendur sem sérstök hæfnisnefnd mat hæfasta.
Kristín hefur verið sýslumaður á Suðurlandi undanfarin níu ár og auk þess verið settur sýslumaður í Vestmannaeyjum, nú síðast frá árinu 2023. Kristín hefur jafnframt verið formaður Sýslumannaráðs frá árinu 2018. Hún lauk kandídatsprófi frá lagadeild Háskóla Íslands árið 2006. Árið 2025 lauk hún stjórnunarnámi frá Said Business School við University of Oxford. Þá hefur hún hefur lagt stund á stjórnunarnám í Endurmenntun Háskóla Íslands og Opna háskólanum.
„Það er mér heiður að fá að takast á við þetta stóra og mikilvæga verkefni og ég er þakklát fyrir það traust sem mér og mínum störfum hingað til er sýnt með skipun minni. Unnin hefur verið mikil undirbúningsvinna frá því að lögin voru samþykkt og góður grunnur verið lagður að vegferðinni undanfarin ár. Nú tekur við nýtt tímabil í sameiningarferlinu þar sem áfram verður lögð mikil áhersla á góða samvinnu og samstarf við reynslumikið og vandað starfsfólk embættanna,“ segir Kristín. „Fyrsta verkefnið verður að heimsækja allar starfsstöðvar embættisins og kynnast enn betur því öfluga starfsfólki sem mun starfa við eitt sameinað embætti hringinn í kringum landið.“
Níu embætti sameinuð í eitt
Frá áramótum verða níu sýslumannsembætti sameinuð í eitt umdæmi með starfsstöðvar um land allt og núverandi starfsfólk færist til hins nýja embættis. Þetta er stór og mikil breyting í íslenskri stjórnsýslu og mun Kristín vinna ásamt ráðuneytinu að undirbúningi og innleiðingu sameiningarinnar.
„Þjónusta ríkisins á ekki að ráðast af póstnúmeri. Með einu öflugu embætti tryggjum við jafnari og betri þjónustu við almenning, betri nýtingu fjármuna og sterkari stjórnsýslu um land allt. Við fækkum ríkisstofnunum um 5% en byggjum um leið upp sterkara sýslumannsembætti fyrir landið allt,“ segir Þorbjörg S. Gunnlaugsdóttir, dómsmálaráðherra.